व्यर्थ कोशिश मत कर

 विधि के विधान ल टाले के कोशिश मत कर

तैं मनखे आस मनखे ...हर चीज ल जाने के कोशिश मत कर

तैं कर वही जो तोर बस में हे

तैं धर वही जो तोर वश में हे

जो तोर बस में नई हे ओला जबरन ताने के कोशिश मत कर

तैं मनखे आस मनखे... हर चीज ल जाने के कोशिश मत कर

तैं मिटा सकथस वही जो तोर खुद के लिखे हे

तैं लिख सकथस वही जो तोर खुद के मिटाए हे

विधाता के लिखे ला तै व्यर्थ साने के कोशिश मत कर

तैं मनखे आस मनखे... हर चीज ल जाने के कोशिश मत कर

अन्न के हर दाना में हर भूखे प्राणी के हक हे

लेकिन तोला ए बात में भी शक हे

ओकर हक ला मारके तैं अपन इमारत ताने के कोशिश मत कर

तैं मनखे आस मनखे... हर चीज ल जाने के कोशिश मत कर

विधाता के गढ़े संसार मा सब बरोबर हे

सबके चमड़ा खाल हे सबके लहू लाल हे

तैं ऊंच नीच अउ धन दौलत से कोनो ला पहचाने के कोशिश मत कर

तैं मनखे आस मनखे... हर चीज ल जाने के कोशिश मत कर